(القط مايحبش الا خناقه ) ايه المثل العبيط ده استوقفني كثيراً في حياتي .. فكنت كل ما اتخانق مع حد ولو في الشارع اتخيل نفسي في مكان عمنا القط ده واقول مايكونش ده خنّاقي ! بس انتم لو شفتم اللي بتخانق معاهم كنتوا تقولوا حبل المشنقه أرحــــم وبالعقل كده ! ازاي احب واحد دايماً بيتخانق معايا ! وماشي عكسي علي طول الخط ! اقوله يمين .. يقولي شمال يقولي فوق .. اقوله تحت هانقف في النص يعني ؟ ولا هانروح شيــميــن ! ثم انا بتخانق مع طوب الأرض يبقي كل دول في الأخر هاحبهم ؟ دي تبقي مصيبة وطبلت فوق دماغي الناس اللي طلعت المثل ده أكيد في بينها وبين القطط حاجة .. ويمكن الفيران هي اللي طلعته علشان تسوء سمعه القطط وتخللي كل الناس تمسك في خناقهم قال ايه يعني بيحبوهم ثم اشمعني يعني القطط ؟ ليه مايكونش العصفور مايحبش الا خناقه ! أو السمك مايحبش الا خناقه ! أو حتي الفيل مايحبش الا خناقه ! أي نعم العلم اثبت ان كل متضادان متجاذبان وكل متشابهان متنافران لكن ايش دراكم ان العلم ده كمان مش عميل للفئران ؟؟؟؟ ام المفهومية